سوال

ایک شخص شفیق احمد کا انتقال ہوا ،انہوں نے دو شادیاں کی تھیں پہلی زوجہ کانامحمودہ تھا  وہ سات سال زندہ رہیں پھر ان کا انتقال ہوگیا تھا ،محمودہ سے دو اولاد ہوئیں ،ایک بیٹا محمد انیس (یہ ڈھائی سال کی عمر میں والدین کی حیات میں وفات پاگیا تھا)دوسری بیٹی زیب النساء ہوئیں،پھر شفیق احمد مرحوم نے دوسری شادی حبیب فاطمہ سے کی جن سے چار اولاد ہوئیں تین لڑکے (شمشاد احمد،اعجاز احمد،ارشاد احمد)اور ایک لڑکی (کشور) ۔شفیق احمد مرحوم کا 2000ء میں انتقال ہوا،اور حبیب فاطمہ کا انتقال 2012 ء میں ہوا۔اب شفیق احمد مرحوم کی جائیداد کس طرح ان کے ورثاء کے درمیان تقسیم ہوگی؟

نوٹ:حبیب فاطمہ مرحومہ کا جب انتقال ہوا تو ان کے انتقال کے وقت ان کے والدین کا پہلے ہی سے انتقال ہوچکا تھا۔

جواب

 صورت مسؤلہ میں میت کے حقوق مقدمہ یعنی تجہیز وتکفین کا خرچہ نکالنے کے بعد ،اگر میت پر کوئی قرضہ تو اسے ادا کرکے ،اور اگر میت نے کوئی جائز وصیت کی ہو تو اسے ایک تہائی مال سے نافذ کرکے بقیہ کا جائیداد منقولہ (سونا ،چاندی ،روپے)و غیر منقولہ(زمین ،مکان،پلاٹ)وغیرہ کو 448 حصوں میں تقسیم کیا جائے گا۔مرحوم کے بیٹے شمشاد،اعجازاور ارشاد میں سے ہر ایک کو 114 حصے،مرحوم کی بیٹی کشور کو 57 حصے اور مرحوم کی بیٹی زیب النساء کو 49حصے ملیں گے۔

صورت تقسیم یہ ہوگی:

یعنی شفیق احمد مرحوم کی جائیداد میں ان کے بیٹوں (شمشاداحمد،اعجاز احمد،ارشاد احمد)میں سے ہر ایک کو 25.44 فیصد حصہ،مرحوم کی بیٹی کشور کو 12.72 فیصد اور مرحوم کی بیٹی زیب النساء کو 10.93 فیصد ملے گا۔

واللہ سبحانہ وتعالیٰ اعلم بالصواب

                                                                                                      دارالافتاءمدرسہ عارف العلوم کراچی

                                                                                                     30جمادی الاولیٰ 1447ھ/22 نومبر 2025 ء

                                                                                                            فتویٰ نمبر:497